Alarm në vendin fqinj! Raportohet për 6 v*ktima nga ethet e Nilit, disa të tjerë të…
Bilanci i viktimave nga virusi i Nilit Perëndimor, i njohur ndryshe si Ethet e Nilit, është rritur në gjashtë persona në Maqedoninë e Veriut. Një 72-vjeçar nga Shkupi ka ndërruar jetë në spital pas një beteje 15-ditore, gjatë së cilës ai paraqiti një gjendje shëndetësore tejet të rënduar.
Ndërkohë, frika po shtohet për shkak të përhapjes së virusit, me autoritetet shëndetësore që konfirmojnë 51 pacientë të prekur deri më tani. Pjesa dërrmuese e këtyre rasteve janë evidentuar në rajonin e gjerë të kryeqytetit, Shkupit.
Sipas të dhënave, shumica e të prekurve i përkasin grupmoshës mbi 60 vjeç. Në disa prej tyre, virusi ka shkaktuar komplikacione të rrezikshme që prekin sistemin nervor qendror, duke çuar në diagnostikime si meningjiti apo encefaliti.
Ritmi i përhapjes po shkakton jo pak shqetësim, duke qenë se nga tetë raste të raportuara në përfundim të korrikut, shifra është rritur në 51 brenda një harku të shkurtër kohor. Kjo ecuri po e shndërron këtë shpërthim në një ndër më kritikët për vendin që nga viti 2011, kur ky virus u shfaq për herë të parë në Maqedoninë e Veriut.
Si kundërpërgjigje ndaj kësaj situate, institucionet kanë shpallur gjendjen e epidemisë në disa bashki të Shkupit, duke intensifikuar monitorimin epidemiologjik dhe masat për zhdukjen e mushkonjave.
Në fund, vlen të përmendim se ky virus i rrezikshëm ka prekur edhe vendin tonë, ku një qytetar i moshuar nga Korça ka rezultuar pozitiv ndaj infeksionit.
