Arsimi në Zl/ Ndahet nga jeta profesori i njohur, edukoi e mësoi breza të tërë

Në moshën 62-vjeçare, akademiku i shquar Albert Riska, një figurë emblematike e Universitetit të Elbasanit “Aleksandër Xhuvani”, ka ndërruar jetë. Përmes një njoftimi të publikuar në rrjetet sociale,

institucioni universitar bëri me dije lajmin e hidhur për humbjen e Prof.as. dr Albert Riskës, i cili u nda nga jeta gjatë ditës së djeshme. Në mesazhin e tyre, përfaqësuesit e universitetit shprehën ngushëllimet më të sinqerta për familjen, miqtë, kolegët dhe studentët e shumtë që patën fatin ta njihnin profesorin.

Homazhet dhe ceremonia e fundit lamtumirëse për profesorin do të organizohen këtë të premte, duke nisur nga ora 15:00.

Trashëgimia që Albert Riska lë pas në fushën e gjuhësisë dhe në jetën akademike të Universitetit të Elbasanit është tejet domethënëse. Vepra e tij e gjerë përfshin kontribute të rëndësishme në studimet arumune, onomastikë, etimologji dhe gjuhësi historike.

Kush ishte Albert Riska?

Albert Riska lindi më 8 shtator 1963. Karriera e tij akademike u ndërtua tërësisht pranë Universitetit “Aleksandër Xhuvani” të Elbasanit, ku edhe përfundoi studimet e larta në Gjuhë-Letërsi. Pasi zhvilloi një aktivitet të shkurtër në mësimdhënie, ai iu përkushtua kërkimit shkencor dhe punës si pedagog për mbi tri dekada, duke u fokusuar te historia e gjuhës shqipe. Ai arriti gradën “Doktor i shkencave” në vitin 2004, ndërsa në vitin 2013 mori titullin “Profesor i Asociuar”.

Për dy dekada, Riska shërbeu në role të ndryshme drejtuese pranë Universitetit të Elbasanit, duke menaxhuar seksione dhe departamente. Nga viti 2016 deri në 2022, ai ushtroi detyrën e dekanit të Fakultetit të Shkencave Humane, krahas angazhimit si redaktor i Buletinit Shkencor UNIEL dhe sekretar i Këshillit Botues.

Fokus i veçantë në hulumtimet e tij ishte gjuha arumune dhe ndërveprimet e saj me gjuhën shqipe, çështje këto të pasqyruara në monografinë “Arumunët – shënime për gjuhën dhe kulturën” (2005). Gjithashtu, në librin “Shqipja dhe Krishterimi”, ai eksploroi lidhjet komplekse mes historisë, gjuhës shqipe dhe përhapjes së krishterimit në trojet ilire, bazuar në të dhënat e grumbulluara nga ekspeditat e tij në terren.

Krahas përkushtimit shkencor, Riska ishte gjithashtu një përkthyes, redaktor dhe bashkautor i teksteve mësimore. Përmes botimit “Shqipja e qeshur” (2018), ai shpalosi një këndvështrim tjetër dhe një lidhje të veçantë me gjuhën.