I dashuri i ndjerë i aktrimit turk, Serhat Kiliç, shuhet në moshën 51-vjeçare

Mediat në Turqi janë tronditur nga një lajm i hidhur, pasi aktori i mirënjohur Serhat Kiliç u gjet pa shenja jete brenda shtëpisë së tij, e cila ndodhet në lagjen Nurtepe të zonës Kagithane në Stamboll.

Mungesa e komunikimit prej disa ditësh me 51-vjeçarin bëri që e dashura e tij të shkonte pranë banesës për ta kërkuar, duke zbuluar kështu trupin e pajetë. Pas përpjekjeve të pasuksesshme për të marrë një përgjigje në derë, partnerja e tij hyri brenda dhe e gjeti aktorin të ulur në një kolltuk në ambientet e sallonit.

Duke qenë se ai ishte i ftohtë dhe nuk shfaqte shenja jetë, ajo njoftoi menjëherë shërbimet e urgjencës. Forcat e rendit dhe ekipet mjekësore mbërritën në vendngjarje për të nisur hetimet lidhur me shkaqet dhe rrethanat e kësaj humbjeje. Gjatë deklarimeve të dhëna para hetuesve, partnerja e viktimës tregoi se aktori ishte duke u përballur me limfomën, një sëmundje malinje që sulmon sistemin imunitar dhe atë limfatik.

Nga këqyrja fillestare e trupit, autoritetet nuk kanë pikasur dëmtime fizike apo shenja të jashtme dhune.

Megjithatë, për të zbardhur plotësisht arsyen e vdekjes, trupi është transferuar në morgun e Institutit të Mjekësisë Ligjore, ku do t’i kryhet autopsia.

Serhat Kiliç njihej si një profil mjaft i spikatur në botën e teatrit, televizionit dhe kinematografisë, ndërsa në vitin 2014 ai kishte inauguruar edhe institucionin e tij privat të artit dhe aktrimit.