“Iku jeta e nipërve të mi”, daja i fëmijëve Manati tregon detajet e rënda nga zj*rri në Jacksonville

Një fatkeqësi e rëndë ka goditur familjen me origjinë nga Lushnja, Manati, e cila jetonte në Jacksonville të Floridës. Mëngjesin e datës 26 gusht, banesa e tyre u përfshi nga një zjarr shkatërrimtar, i cili u mori jetën tre fëmijëve.

Ndër viktimat janë dy 11-vjeçarë binjakë dhe një fëmijë tjetër vetëm 2 vjeç. Ndërkaq, anëtarët e tjerë të familjes, duke përfshirë prindërit, një foshnjë dy-muajshe dhe një fëmijë 9-vjeçar, fatmirësisht mbijetuan, ndonëse aktualisht ndodhen të shtruar në spital në gjendje të rënduar shëndetësore.

Në një prononcim për “Me Zemër të Hapur”, daja i fëmijëve ndau me publikun vuajtjen e madhe shpirtërore dhe faktin se për shkak të distancës së emigracionit, ai nuk kishte arritur kurrë t’i takonte personalisht nipërit e tij.

“Po pres të ikim në SHBA. Nipërit shkuan 11 vjeç, por na ka ndarë emigrimi dhe nuk i kam parë as kur kanë lindur, tani po iki t’i fus në dhe”, shpjegoi ai duke reflektuar mbi dhimbjen e pamatë të të afërmve të tij.

Sipas versionit të dhënë nga daja, dyshohet se flakët janë shkaktuar nga një lodër e lënë për t’u karikuar përgjatë orëve të natës.

“Gjithçka ka ndodhur nga një lodër që i kanë blerë fëmijëve. Ka qenë në karikim dhe ka plasur bateria gjatë natës”, theksoi ai gjatë rrëfimit të tij.

Sa i përket nënës së fëmijëve, daja ka sqaruar se nuk ka pasur asnjë kontakt me të, pasi ajo po përballet me një traumë të thellë psikologjike pas humbjes së tmerrshme.

“Me motrën nuk kam folur sepse nuk ka qenë në gjendje të flasë. Janë me trauma edhe motra ime edhe fëmijët. Nuk duron dot kur vjen nata dhe errësohet”, tregoi ai për situatën e rëndë të motrës së tij.

Lajmin për këtë ngjarje të kobshme, ai bëri me dije se e pranoi fillimisht nga xhaxhai i tij më i ri.