Merrni masat! Moti pritet të bëj kthesën drastike këtë të Premte, ja cfarë parashikohet

Pas ditëve me mot të qëndrueshëm dhe temperatura relativisht të larta, **e premtja, 25 shtator, pritet të sjellë një ndryshim të ndjeshëm të kushteve atmosferike**.

Ndërsa dita e enjte parashikohet kryesisht e kthjellët dhe me temperatura që në vend arrijnë deri në rreth 28°C, situata ndryshon gjatë së premtes, kur shtimi i vranësirave dhe rikthimi i reshjeve do të sjellin edhe një freskim të ndjeshëm.

Në Tiranë, parashikimet aktuale tregojnë **reshje shiu, veçanërisht gjatë pjesës së parë të ditës**, ndërsa temperatura maksimale pritet të zbresë në rreth **20°C**, krahasuar me rreth 26°C që parashikohen një ditë më parë.

Edhe modele të tjera meteorologjike sinjalizojnë mundësi të lartë për reshje gjatë së premtes, ndërsa disa prej tyre nuk përjashtojnë edhe episode me shtrëngata.

**Rënia e temperaturave do të jetë një nga ndryshimet më të dukshme**, duke bërë që pas ndjesisë së motit të ngrohtë të ditëve të fundit, e premtja të sjellë një atmosferë dukshëm më të freskët dhe tipike vjeshtore.

Sipas parashikimeve të deritanishme, ndryshimi nuk pritet të zgjasë shumë. Gjatë fundjavës temperaturat pritet të rikuperohen gradualisht dhe intervalet me diell të bëhen sërish më të shpeshta.

Megjithatë, parashikimi mund të pësojë përditësime në orët në vijim, sidomos për shpërndarjen dhe intensitetin e reshjeve.