PërpIasja që bëri xhiron e rrjetit, Prokuroria e Pejës hap çështje për Joz Markun

Pas shpërndarjes së gjerë të pamjeve që shfaqnin përplasjen fizike mes Joz Markut dhe Edi Kuçit në rrjetet sociale, çështja ka marrë një kthesë të re.

Siç bëhet e ditur nga Klan Kosova, Prokuroria Themelore e Pejës ka zyrtarizuar nisjen e një hetimi ndaj Joz Markut për këtë ngjarje. Në të njëjtin raportim konfirmohet se organet e akuzës kanë kërkuar arrestimin e tij si pjesë e veprimeve të ndërmarra procedurale.

Informacioni për hapjen e rastit është konfirmuar për Klan Kosovën nga zëdhënësi i Prokurorisë Themelore në Pejë, Shkodran Nikçi.

Vendimi vjen pasi u publikuan disa video nga përballja mes Jozit dhe Edit. Në pamjet që kanë qarkulluar shihet Edi i rrethuar nga disa persona, ndërsa Jozi në një moment e godet atë. Në videon më të gjatë të publikuar më pas dëgjohet edhe debati mes tyre lidhur me deklaratat e mëparshme të Edit ndaj këngëtarit.

Vetë Edi reagoi pas publikimit të pamjeve, duke pretenduar se ishte gjendur “15 me 1” dhe duke e cilësuar atë që kishte ndodhur si “pabesi” dhe “tradhti”.

Tashmë çështja ka kaluar edhe në duart e organeve të drejtësisë. Hapja e një rasti dhe kërkesa e raportuar për arrestim nuk nënkuptojnë përcaktimin e përgjegjësisë penale të Joz Markut, e cila do të varet nga procedurat dhe vendimet e institucioneve kompetente.