PërpIasje fataIe në Fier-Shegan-Kuçovë: Një grua përfundon në spital, autori në arrati

Në orën 12:30 të ditës së sotme, në rrugën nacionale që lidh Fierin, Sheganin dhe Kuçovën, është regjistruar një përplasje e rëndë rrugore.

Në bazë të rrëfimeve të personave që ndodheshin në vendngjarje, mjeti i tonazhit të rëndë me targa vendase po udhëtonte nga Berati drejt Lushnjës, kur fillimisht goditi një makinë që po qarkullonte në atë moment, për të përfunduar më pas mbi një automjet tjetër të palëvizshëm, i cili ndodhej i parkuar buzë rrugës, përballë një shtëpie.

Drejtuesi i kamionit nuk ka ndaluar për t’i dhënë ndihmën e parë të dëmtuarve, duke u larguar menjëherë nga vendi i ngjarjes. Pavarësisht angazhimit të menjëhershëm të forcave policore në kërkim të tij, deri më tani shoferi mbetet i paidentifikuar dhe në arrati.

Për pasojë, drejtuesja e njërit prej mjeteve të përfshira ka pësuar lëndime të rënda fizike dhe është dërguar me urgjencë drejt spitalit të Lushnjës. Makina e saj është përplasur gjithashtu me një shtyllë elektrike, ndërsa mjeti tjetër i përfshirë, një “Audi”, ka raportuar vetëm dëme materiale.

Aktualisht, ekspertët e grupit hetimor dhe efektivët e policisë po kryejnë verifikimet në vendin e ngjarjes për të zbardhur dinamikën e plotë të këtij incidenti, ndërsa pritet një njoftim zyrtar me detaje të mëtejshme nga ana e Policisë së Shtetit.