Selin Bollati lë pa punë këtë moderatore, merr në dorë drejtimin e këtij emisioni në Top Channel?

Emri i Selin Bollatit po lakohet gjerësisht për ndryshimet e mundshme në programacionin e ardhshëm televiziv të Top Channel. Pasi mbylli rrugëtimin e saj te “Big Brother VIP Albania 5”, Bollati duket se po përgatitet për një rikthim në ekran, por përmes një angazhimi të ndryshëm nga ai i mëparshmi.

Burime pranë Kryefjala.com bëjnë me dije se ajo është përzgjedhur për t’u bërë pjesë e panelit në emisionin “Goca & Gra” për edicionin që vjen.

Një zhvillim i tillë do të shënonte një moment kyç për karrierën e saj mediatike, pas eksperiencës së suksesshme në “Big Brother VIP Albania”, ku ajo rrëmbeu fitoren dhe çmimin prej 100 mijë eurosh.

Ky kalim nga formati i reality show-t drejt një spektakli të bazuar te moderimi dhe debati do ta poziciononte Bollatin si një ndër fytyrat e reja në panelin e “Goca & Gra”. Bëhet fjalë për një program ku tematikat sociale, çështjet e aktualitetit dhe dinamikat e përditshmërisë diskutohen gjerësisht nga protagoniste të ndryshme në studio.

Në harkun kohor të sezonit të fundit, i cili u transmetua duke filluar nga muaji shkurt, pjesë e panelit të “Goca & Gra” kanë qenë emra si Ori Nebijaj, Rozana Radi, Rudina Dembacaj, Sherina Spahiu dhe Ema Andrea.

Mbetet ende e paqartë nëse angazhimi i Bollatit do të sjellë ndryshime në përbërjen aktuale të moderatoreve apo nëse produksioni po mendon për një zgjerim të grupit.

Përfaqësuesit e Top Channel si dhe vetë Bollati nuk kanë dalë ende me një deklaratë zyrtare për ta vërtetuar këtë lajm.

Megjithatë, nëse këto zëra konfirmohen, fituesja e BBVA 5 do të shfaqet shumë shpejt në një dimension të ri televiziv.