Humbje e rëndë për artin shqiptar, ndahet nga jeta artisti i njohur!

Bota akademike dhe ajo artistike në vendin tonë janë në zi pas ndarjes nga jeta të profesorit të njohur, Qirjako Meniko, në moshën 81-vjeçare.

Njoftimin për këtë humbje të dhimbshme e ka bërë publik Universiteti i Arteve në Tiranë përmes një postimi në rrjetet sociale.

Qirjako Meniko, i cili lindi në Himarë më 15 korrik 1945, përfundoi studimet e larta për pikturë në Institutin e Lartë të Arteve në vitin 1970.

Karrierën e tij e nisi si redaktor për artet figurative në gazetën Drita.

Nga viti 1973, ai u angazhua në Galerinë Kombëtare të Arteve, duke punuar në sektorin e studimeve teorike dhe historike, ndërsa në vitin 1975 nisi rrugëtimin e tij si pedagog i Historisë së Arteve Figurative pranë Katedrës së Lëndëve Teorike në ILA, ku mbuloi këtë lëndë për degën përkatëse.

Gjatë harkut kohor 1992-1994, ai mbajti postin e drejtorit në Galerinë Kombëtare të Arteve.

Duke filluar nga mesi i viteve ’90, ai vijoi kontributin e tij akademik si pedagog i lëndëve Pikturë dhe Histori Arti Figurativ në Fakultetin e Artit Skenik, pranë Katedrës së Skenografi-Kostumografisë.

Përveç veprimtarisë pedagogjike, Meniko ka lënë pas një trashëgimi të vyer artistike, duke qenë autor i shumë pikturave të ekspozuara brenda dhe jashtë Shqipërisë, si dhe pjesëmarrës në aktivitete të shumta kombëtare e ndërkombëtare.

Ai gjithashtu dha një kontribut të rëndësishëm në literaturën artistike, duke hartuar tekstin bazë të historisë së arteve figurative botërore për ILA, si dhe tekste të tjera mësimore për shkollat profesionale dhe studentët e arteve monumentale e të aplikuara, shoqëruar me shkrime të shumta kritike.

Fakulteti i Artit Skenik dhe Universiteti i Arteve kanë shprehur ngushëllimet më të sinqerta për familjen dhe të afërmit e të ndjerit.

Ceremonia mortore është planifikuar të mbahet të shtunën, më 8 gusht 2026, në orën 11:00, duke u nisur nga ambientet e “PREMIUM” Funeral Home.