Emisioni aq i dashur për shqiptarër me protagonistë fëmijë të vegjël, “Ne kurthin e Piter Pan”, rikthehet në ekran dhe ka premierën sonte në mbrëmje në Tv Klan.
Pas një maratone të vërtetë audicionesh me vogëlushë që konkurruan për t’u bërë pjesë e kastit, më në fund sonte do të shohim 10 finalistet e përzgjedhur, të cilët pritet të befasojnë jo vetëm publikun por dhe te ftuarit VIP me pyetjet e tyre.
Meqë jemi këtu, dy personazhet e parë të mbrëmjes vijnë nga skena prestigjoze botërore. Ilir Shaqiri do të jetë një nga të ftuarit. Balerini do të shfaqet sërish në ekran pas fitores në Big Brother Vip dhe do të përballet me kuriozitetin dhe pyetjet e fëmijëve.
Tenori Josif Gjipali do të jetë gjithashtu i ftuar “Në kurthin e Piter Pan”. Ai do të ndajë me fëmijët të pathënat dhe vështirësitë e ngjitjes në karrierë.
Ideja e formatit mbetet e njëjtë, fëmijët e përzgjedhur do të vënë në siklet me pyetjet e tyre të ftuarit. Një pjesë e mirë e pyetjeve janë me skenar, por sigurisht kur ka fëmijë në mes ka dhe pyetje që iu vijnë direkt në mendje.
Moderatorja e emisioni nuk ndryshon, mbetet e përhershmja Alketa Vejsiu, po ashtu regjizore është e zakonshmja Vera Grabocka. Emisioni fillon pak pas orës 20:00 në TV Klan.
