Pas disa javësh do bëheshin prindër/ Si e reja shqiptare u vr* nga bashkëshorti që dyshohet se v*ante nga problemet mendore

Ngjarja e rëndë ka ndodhur gjatë mbrëmjes së së dielës në zonën e Malishevës, ku 25-vjeçarja Jetlira Foniqi ndërroi jetë. Viktima, e cila po përjetonte pritjen e ëmbël të shtatzënisë, gjeti vdekjen pas një sulmi me armë zjarri brenda banesës së saj në fshatin Kërvasari. Pavarësisht përpjekjeve të shpejta të ekipeve mjekësore për t’i dhënë ndihmën e nevojshme, e reja nuk arriti t’u mbijetonte plagëve të shkaktuara.

Në të njëjtin incident, bashkëshorti i saj, 26-vjeçari Egzon Bytyqi, pësoi lëndime fizike. Përmasat e kësaj tragjedie rëndohen nga pista kryesore e hetimit që po ndiqet nga autoritetet në Kosovë.

Dyshimet e para sugjerojnë se 26-vjeçari mund të jetë autori i këtij krimi brenda familjes. Sipas informacioneve nga Sinjali, hetimet po përqendrohen te mundësia që Bytyqi të ketë përdorur armën e të atit për të qëlluar bashkëshorten e tij dhe më pas për t’i drejtuar armën vetes. (Vlen të theksohet se asnjë informacion apo dyshim i ngritur nuk është zyrtar).

Egzon Bytyqi prej katër vitesh ishte shpërngulur në Gjermani për punë, ndërsa çifti ishte kthyer në Kosovë afro një muaj përpara se të ndodhte kjo ngjarje fatale.

Përpara hetuesve, familjarët kanë dëshmuar se i riu kohët e fundit po kalonte periudha të vështira për shkak të problemeve me shëndetin mendor.

Ndërkohë, familja e viktimës është zhytur në zi të thellë, duke shprehur dhimbjen për ndarjen nga jeta të 25-vjeçares.

“Njoftim! Të Allahut jemi dhe te ai do të kthehemi! Të nderuar miq, shokë e dashamirë, ju njoftojmë që sot ka ndërruar jetë vajza e agjës, Jetlira Baki Foniqi. Zoti e mëshiroftë dhe dritë pastë shpirti i saj! Për ditën dhe orën e varrimit ju njoftojmë me kohë. E pikëlluar Familja Foniqi”, thuhet në njoftimin e bërë nga familjarët e të resë.