Ambasadori i Kosovës në Tiranë, Nait Hasani ka bërë të ditur se familja katër anëtarshe e cila humbi jetën sonte në një aksident tragjik në “Rrugën e Kombit”, është nga Prishtina.
Ambasadori Nait Hasani për Syri.net Kosova ka thënë se ka qenë e pamundur të bëhet verifikimi i vendbanimit të viktimave.
Mirëpo sipas tij, duke ju referuar regjistrimit të makinës me të cilën familja u aksidentua, ata janë nga rajoni i Prishtinës.
“Në bazë të regjistrimit të makinës, familja është nga Prishtina. Ne ju kemi përcjell letërnjoftimet ministrisë së Punëve të Jashtme të Kosovës. Ne nuk kemi mundësi t’i verifikojmë në bazë të letërnjoftimeve”, ka thënë Hasani për Syri.net Kosova.
Ai ka njoftuar po ashtu se katër anëtarët e familjes Avdijaj që kanë humbur jetën janë: Blerim Avdijaj 1970, Anjeza Avdijaj 1987, Medina Avdijaj 2015 si dhe Kledi Koci 2005.
Ndërsa e mbijetuara e vetme e këtij aksidenti është 3-vjeçarja e kësaj familje Violeta Avdijaj është në gjendje të rëndë, e cila sipas Hasanit është duke marrë trajtimin mjekësor në spitalin e Traumës në Tiranë.
“Po, ka ndodhur një aksident në orët e mbrëmjes në Rubik te pika e karburantit Toma. Katër persona kanë humbur jetën dhe një vajzë tre vjeçare është në gjendje të rëndë. Ajo është duke marrë trajtim në spitalin e Traumës në Tiranë”, ka deklaruar më tej Hasani.
Në aksidentin e ndodhur mbrëmjen e kësaj të enjte në aksin rrugor Rrubnik-Rrëshen, një automjet ‘Citroen’ me të cilën udhëtonin familja kosovare u përplas me një kamion i cili drejtohej nga shtetasi kosovar, Isa Ishala i cili siç raportohet është në gjendje të rëndë./ Syri.net Kosova/
