Sot u zhvillua ceremonia mortore për Eldion Kelmendin, i cili humbi jetën tragjikisht një ditë më parë në një aksident të rëndë trafiku në fshatin Bllagajë të Pejës.
Eldioni ishte vëllai i këngëtarit të njohur nga Peja, Besart Kelmendi, i njohur me emrin artistik Gjesti, dhe lajmi për vdekjen e tij ka prekur thellë opinionin publik, familjarët, miqtë dhe gjithë komunitetin.
Ceremonia e varrimit u mbajt në varrezat e fshatit Pavlan të Pejës, ku morën pjesë qindra qytetarë që erdhën për t’i dhënë lamtumirën e fundit të riut që u nda nga jeta në mënyrë të parakohshme. Atmosfera ishte e rëndë, ndërsa dhimbja dhe lotët e familjarëve prekën këdo që ishte aty i pranishëm.
Në mesin e pjesëmarrësve ishin edhe shumë figura publike, kolegë dhe miq të ngushtë të këngëtarit Gjesti, të cilët u solidarizuan me familjen në këtë ditë zie. Ndër ta u panë këngëtarja e njohur Dafina Zeqiri dhe artisti Yll Limani, të cilët me praninë e tyre shprehën mbështetje dhe ngushëllim për familjen Kelmendi në këtë moment të vështirë.
Ngjarja tragjike ka lënë gjurmë të thella tek të afërmit, shokët dhe të njohurit e Eldionit, i cili kujtohet si një djalë i qeshur, i dashur dhe i respektuar nga të gjithë.
