Çifti Donald Veshaj-Beatrix Ramosaj ishte kryelajmi rozë i këtij viti. Ata krijuan një lidhje në BBV, por që u shua shpejt dhe fansat u zhgënjyen shumë me vendimin e tyre për t’i dhënë fund.
Aktori Veshaj ka folur për herë të parë për ndarjen nga këngëtaren Beatrix Ramosaj. Ai nuk e kishte bërë këtë më parë, që kur doli nga shtëpia e Big Brother VIP i renditur në vendin e dytë.
Mbrëmjen e djeshme në emisionin “Më lër të flas”, kur u pyet se pse erdhi ndarja e fundit, Donaldi u përgjigj shkurt duke thënë: “Nuk ngjitëm”. Këngëtarja Beatrix Ramosaj nuk ka bërë ende një reagim për këtë.
Përgjigjen reale të kësaj pyetjeje e dimë të gjithë. Beatrix, pak ditë para finales së Big Brother VIP, shkoi në Dubai me të dashurin e saj misterioz. Donaldi e mori vesh më vonë.
Ai nuk ia fali kurrë këtë lëvizje, sepse priste që e dashura e tij ta mbështeste në ditët më të rëndësishme të Big Brother VIP, kur priste edhe të fitonte.
