Një grua ka ndarë në Reddit se po mendon seriozisht të kërkojë divorc, sepse ndjehet si “personi i tretë” në martesën e saj për shkak të vjehrrës së saj dominuese.
Ajo thotë se para martesës nuk kishte pasur ndonjë konflikt të madh me nënën e burrit, por tani kjo e fundit duket shumë e pakënaqur me të dhe vazhdimisht kalon kufijtë. Në një rast, vjehrra e ka pyetur çiftin nëse përdorin masa mbrojtëse gjatë marrëdhënieve, dhe burri ka ndarë detaje nga jeta e tyre seksuale, duke e quajtur këtë sjellje “normale”, edhe pse gruaja ishte ndjerë e cënuar.
Ajo shton se vjehrra e saj e tall në mënyrë pasiv-agresive dhe përbuz interesat e saj, si dashuria për librat. Për më tepër, ajo përfshihet në “gara emocionale”, duke deklaruar se do ta dojë gjithmonë djalin më shumë se kushdo tjetër, dhe e telefonon vazhdimisht për të qarë dhe për të shpërthyer emocionalisht – madje edhe kur ai është i tronditur pas humbjes së babait të tij. Ajo nuk kërkon ndihmë profesionale, por pret që djali të jetë mbështetja e saj. Një rast tjetër, ajo e telefonoi në punë për një problem me wifi-n, edhe pse në shtëpi ndodheshin dy persona të tjerë, përfshirë një IT por tha se “nuk donte t’i shqetësonte” – ndryshe nga djali.
Gruaja thekson gjithashtu se është nga një vend tjetër dhe se vjehrra ka bërë herë pas here komente ksenofobike. Në një bisedë me prindërit e burrit për një rast krimi, babai i tij tha se do ta dorëzonte në polici nëse djali i tij do bënte diçka të keqe. Ndërsa vjehrra tha, me seriozitet, se nuk do ta bënte kurrë dhe do gjente mënyrë për ta ndihmuar, sepse ai ishte “bebja e saj”. “M’u ngrinë flokët”, shkruan ajo.
Problemi më i madh për të mbetet që burri e mbron gjithmonë të ëmën. Ai i minimizon ndjenjat e saj, duke thënë se mamaja “nuk ka qëllime të këqija”, “thjesht është vetvetja” dhe se ajo është “shumë e ndjeshme”.
“Po ndihem e padukshme, sikur kurrë nuk do të pranohem vërtet në këtë familje. E dua burrin tim, por po mendoj seriozisht nëse kjo martesë është e qëndrueshme. Nuk ndihem më as e tërhequr prej tij, sepse nuk e di çfarë mund t’i tregojë nënës së tij… dhe nuk dua të jem e treta mes tyre”, shkruan ajo.
Me afrimin e festave, ajo po mendon ta nisë bisedën për divorc dhe pyet përdoruesit e Reddit:
“Keni ndonjë këshillë si ta bëj këtë sa më qetë dhe si të marr gjërat e mia pa probleme? A po e teproj?”
