Librat, përmbajtja e të cilëve pasqyron ngjarjet dhe veprimtaritë e viteve 1913- 1944, janë konsideruar aktualë dhe janë klasifikuar në kapitujt dhe degët përkatëse. Librat, përmbajtja e të cilëve pasqyron ngjarjet dhe veprimtaritë para vitit 1913, janë konsideruar historikë dhe materiali është klasifikuar në histori, në ndarjet përkatëse.
Përjashtim bëjnë veprat me karakter biografik, të cilat janë klasifikuar fillimisht te biografia, duke vijuar me referimet në degët përkatëse. Në librat, ku janë trajtuar disa tema apo probleme, përmbajtja është klasifikuar te tema kryesore, duke dhënë referime edhe për nëntemat. Pra, për libra të tillë ka dy e më shumë klasifikime (referime).
Materiali është ndarë në bazë të klasifikimit të parë të çdo libri. Skeda është vendosur në klasifikimin e parë. Brenda çdo rubrike klasifikimi materiali është renditur alfabetikisht sipas autorit apo titullit (për librat pa autorë). Përjashtim është bërë në rastet kur i njëjti titull është botuar disa herë; në këto raste është ruajtur renditja sipas vitit të botimit të librit, duke filluar nga botimi i parë.
