Përshkrimi është bërë simbas standardeve të përshkrimit bibliografik të viteve kur nisi puna për hartimin e kësaj bibliografie, pasuruar edhe me elementë të tjerë bibliografikë, të vendosura nga autorët bibliografë në funksion të çdo informacioni për botimet.
Në të dhënat bazë të njësive bibliografike është ruajtur drejtshkrimi i kohës kur është botuar vepra; edhe në zonën e shënimeve është bërë kujdes që ai të mund të ruhet në masën më të madhe të mundshme.
Në shqyrtimin dhe regjistrimin e të dhënave ka shërbyer si bazë fleta e titullit; në rastet kur ajo ka pasur mangësi, të dhënat janë saktësuar nga kopertina apo teksti.
Të dhënat që pasqyrohen për çdo njësi bibliografike janë: autori, titulli, nëntitulli, të dhënat për hartuesit, përmbledhësit, përshtatësit, përkthyesit, redaktorët, kompozitorët.
