Për kulturën shqiptare duhet quajtur fat i lumë fakti që pjesa zotëruese e botimeve shqipe, prej Buzukut unikal – të riprodhuar nga At Justin Rrota – dhe deri te ne, janë mbledhur dhe ruajtur në koleksionet e Bibliotekës Kombëtare të Shqipërisë, sikurse vijojnë të mblidhen e të ruhen: me sa rezulton prej dy pjesëve të para të Bibliografisë në fjalë, ato mund të llogariten përafërsisht në 95 % të totalit të tyre historik.
E famshmja British Library dhe po aq e famshmja Bibiothèque nationale de France mund të konkurrojnë në epokën e sotme të globalizmit me koleksionet e tyre: nga 14 në 15 milionë libra. Kultura shqiptare i detyron mirënjohje Bibliotekës Kombëtare të saj për koleksionet unikale të Librit Shqip. Këto koleksione kanë mundësuar përfundimin e këtyre dy pjesëve të saj.
Dhe pikërisht falë tyre përdoruesve të saj tanimë u ofrohet një informacion pothuajse pranë maksimales: është fjala për një informacion i cili, përtej bibliografisë, do t’i qasë ata tek ai realitet ende i veshur me vagullti shekullore që është historia e Librit Shqip.
