Në të gjitha rastet vlera e shfrytëzimit të regjistrimit që ata bartin varet nga dy faktorë: rëndësia e vetë koleksionit dhe cilësia e katalogut.
Katalogët ekzistues nuk duhen fetishizuar dhe informacioni bibliografik që ata bartin nuk duhet besuar në mënyrë të verbër. Pasaktësitë e tyre jo të pakta shkojnë nga më të lehtat deri te më të mëdhatë. Ja vetëm tre raste të ndeshura gjatë punës për këtë Bibliografi.
Më i lehti: një shkronjë e shtuar në përshkrim. Skeda ekzistuese për librin Gjella e Shën Mërīs s’ Virgjër të Jul Varibobës (1762) ka një transliterim të pasaktë të fjalës së parë të rreshtit të fundit të faqes së titullit: Scitten Mbussat caa Noffi, e cila është shkruar në trajtën Scritten.
