Ashtu sikurse paralajmëroi mbrëmjen e djeshme, kryeministri Edi Rama, episodin e sotëm të podcast-it “Flasim”, e zhvilloi me fituesin e bashkisë së Shkodrës Benet Beci dhe fituesin e BBV Luiz Ejlli. Nga fëmijëria, jeta personale dhe karriera, Rama intervistoi “Blu Brathërs” siç i cilësoi ai për rreth 45 minuta.
Luiz Ejlli përsëriti edhe një herë mirënjohjen e tij ndaj Benet Becit që e ndihmoi në periudhën më të vështirë të jetës së tij, dhe theksoi se Shkodra për herë të parë ka zgjedhur me tru dhe jo me zemër. Gjatë bisedës Luizi kur u pyet për vizën amerikane, u përgjigj duke qeshur se “nuk është non grata” dhe kunji edhe pse jo drejtpërdrejt shkon për “idhullin” e tij, Sali Berisha.
Kryeministri Edi Rama: Ti familjen e ke në Amerikë?
Luiz Ejlli: Po, kam nënën dhe motrën, është e martuar, ka tre fëmijë.
Kryeministri Edi Rama: Po ti shkon atje?
Luiz Ejlli: Kam shkuar, por nuk është se më ka pëlqyer mënyra e jetesës sesi është.
Kryeministri Edi Rama: E merr vizën domethënë?
Luiz Ejlli: Po e marr. E kam marrë njëherë, tani do ma japin prapë besoj se do kem koncerte. Se nuk jam “non grata’’.
Kryeministri Edi Rama: Larg qoftë!
Luiz Ejlli: Unë do iki për të kënduar. Ndoshta do bëhem dhe unë “non grata’’, ku i dihet?!
Kryeministri Edi Rama: Po ti vazhdon këndon?
Luiz Ejlli: Po. Sot madje do isha në studio. Po i thashë kam diçka pak më të rëndësishme. Çfarë ka më tha, se s’po jap emrin. Çfarë ka më të rëndësishme se kjo është ëndrra jote?! Më beso i thashë, është më e rëndësishme, po s’ta them dot dhe qeshi, e mirë më tha.
