Një tjetër video e veçantë me këngëtaren legjendare Parashqevi Simaku po bën xhiron e rrjeteve sociale. Në këtë rast, Simaku është takuar me një turiste shqiptare gjatë një momenti të rastësishëm në rrugët e New York-ut.
Në video, fillimisht këngëtarja duket skeptike kur turistja i thotë se është shqiptare, por dyshimi zhduket sapo bashkëbiseduesja i drejtohet në gjuhën shqipe. Ky moment sjell një reagim të ngrohtë dhe të sinqertë nga Parashqevi Simaku, e cila ndan një bisedë të këndshme me të.
Gjatë takimit, turistja, me shumë dashamirësi, e këshillon këngëtaren që të mos shqetësohet dhe shpreh dëshirën për të pasur mundësi kontakti me të edhe në të ardhmen. Ato bisedojnë duke alternuar shqipen dhe anglishten, me Simakun që pranon se ka vite që nuk e ka praktikuar gjuhën amtare.
Në video, turistja shfaqet shumë entuziaste dhe, përveç se falenderon këngëtaren për momentin që i ka dhuruar, madje e inkurajon të lyejë buzët me një buzëkuq që ia ofron si dhuratë. Ky gjest i thjeshtë, por plot kuptim, e bën bisedën akoma më të ngrohtë dhe të veçantë.
Ja një pjesë nga biseda e tyre, që ka rrëmbyer zemrat e shqiptarëve në internet:
Qytetarja: Ti nuk beson që jemi shqiptarë?
Parashqevi Simaku: Aspak. Dua të them që ne shqiptarët jemi ajo që kemi mbetur nga Roma, Greqia, Perandoria Austriake. Ndaj disa prej nesh kanë ardhur që nga koha e Skënderbeut. Ju e keni ruajtur traditën austro-hungareze.
Qytetarja: Do të jap një buzëkuq. Lyeji pak buzët e kuqe.
Parashqevi Simaku: Të lutem, mos u shqetëso.
Qytetarja: Lyeji, lyeji që të të shohë avokati si yll.
Parashqevi Simaku: E kam shumë më të lehtë të flas anglisht. Me ty për herë të parë kam folur shqip.
Qytetarja: Shumë bukur ke folur.
Parashqevi Simaku: E kam harruar gjithë këto vite.
Qytetarja: Ku të të gjej unë ty? Nuk e kam as telefonin tënd. S’kam as adresën e shtëpisë tënde.
Parashqevi Simaku: Më shkruaj në Facebook. Kërko në Facebook tim dhe do të shohësh fotot e mia, familjen time, gjithçka e kam aty.
Qytetarja: Në çfarë ore futesh në Facebook? Do vij sërish. Sa e bukur u bëre me buzëkuq. S’e di ti sa e bukur u bëre!
Ky moment i rrallë dhe i sinqertë mes një ylli të muzikës shqiptare dhe një fansi ka emocionuar shumë shqiptarë kudo në botë. Videoja është bërë menjëherë virale, duke marrë komente të shumta pozitive që theksojnë modestinë dhe ngrohtësinë e Simakut.
