Mëngjesin e sotëm 48 emigrantë shqiptarë shumica u shpëtuan pranë Gjirit të Somme, Francë. Sipas mediave franceze ekipet e shpëtimit këtë të shtunë në orën 6:15 të mëngjesit, janë njoftuar për një varkë në brigjet e Gjirit Somme e cila kishte mbetur në det pas prishjes së motorit.
Kur ekipet kanë shkuar në vendngjarje, kanë shpëtuar 48 emigrantë që po kalonin Kanalin me shpresën për të arritur në Angli me një varkë 8 metra të gjatë. Ata ishin kryesisht shqiptarë dhe kryesisht meshkuj. Mes dyzet e tetë personave në bord kanë qenë edhe pesë gra dhe tre fëmijë.
Ekipet e shpëtimit në det i çuan emigrantët në portin e Le Tréport në orën 10:00. Pas kësaj ata janë transportuar në spital për kontrolle të mëtejshme mjekësore.
