Personat që shihni në foto janë dy vëllezërit, Mersin dhe Aklen Myftarago të cilët humbën jetën mëngjesin e së shtunës në Itali. Përplasja e dy makinave në zonën Chessa, të provincës 159 “Scansanese” i kushtoi jetën dy vëllezërve me origjinë shqiptare, 38 dhe 44 vjeç. Shqiptarët që jetonin në Arcille, një fshat i Campagnatico ishin punëtorë bujqësie dhe mëngjesin e së shtunës ishin nisur për në punë: i vogli nga të dy kishte dy fëmijë dhe gruaja e tij pret një fëmijë të tretë, ndërsa vëllai i madh kishte tre fëmijë.
Në aksidentin frontal mes dy makinave, nga përplasja mbeti i plagosur një tjetër shqiptar, Redion Arapi 28 vjeç, me banim në Scansano, i cili u transferua në Misericordia. Ai po kthehej në mëngjes në shtëpi dhe sapo u shpëtua nga mjekët iu nënshtruar testit të drogës dhe alkoolit. Dy vëllezërit po udhëtonin me një Peugeot, i cili pas përplasjes së tmerrshme me makinën Audi të shqiptarit tjetër, i cili erdhi në drejtim të kundërt, përfundoi në gropën anësore të rrugës. Autoambulancat dhe dy helikopterë shkuan menjëherë në vendngjarje por dy shqiptarët nuk mundën të mbijetonin.
