U varros në Pavlan të Pejës Eldion Kelmendi, viktima e aksidentit në Bllagajë
Në një atmosferë të rënduar dhimbjeje e pikëllimi, sot iu dha lamtumira e fundit Eldion Kelmendit, i cili humbi jetën si pasojë e aksidentit tragjik që ndodhi të premten në Bllagajë të Pejës.
Ceremonia e varrimit u mbajt në orën 17:00, në varrezat e fshatit Pavlan, ku morën pjesë familjarë, të afërm, miq dhe bashkëqytetarë të shumtë që kishin ardhur për ta përcjellë në banesën e fundit. Dhimbja ishte e madhe, sidomos për faktin se Eldioni ishte vëllai i këngëtarit të njohur pejan, Besart Kelmendi, i njohur me emrin artistik Gjesti.
Aksidenti tragjik ndodhi dje, kur katërçikleta me të cilën po udhëtonte Eldioni bashkë me një tjetër person, u përplas, duke i shkaktuar atij plagë fatale. Për fat të keq, ai nuk arriti t’u mbijetojë lëndimeve. Ndërkohë, personi tjetër që ishte pasagjer në katërçikletë ka mbetur i lënduar rëndë dhe ndodhet nën kujdesin e mjekëve.
Ngjarja ka tronditur opinionin publik në Pejë dhe më gjerë, pasi familja Kelmendi është e njohur në skenën muzikore dhe kulturore të vendit. Shumë bashkëqytetarë kanë shprehur ngushëllimet e tyre përmes rrjeteve sociale, duke i qëndruar pranë familjes në këtë ditë zie.
Autoritetet policore kanë njoftuar se hetimet mbi shkaqet e aksidentit janë ende në vazhdim, në mënyrë që të sqarohen rrethanat e plota të kësaj tragjedie.
