A nuk është ajo e vetmja disiplinë që pa ndërprerë ka studiuar kompozimin, shprehjen formale dhe transmetimin e teksteve nga autorët, tipografët dhe botuesit; shpërndarjen nëpërmjet shitësve të librit me shumicë dhe me pakicë; grumbullimin dhe klasifikimin e tyre prej bibliotekarëve; kuptimin, madje rigjenerimin krijues të tyre, prej lexuesve?
Sido që ta përkufizojmë bibliografinë, asnjë pjesë e këtij vargu ndërveprimesh njerëzore dhe institucionale nuk është e huaj për të. Ajo nuk përshkruan vetëm proceset teknike, por edhe ato sociale të transmetimit të teksteve.
Kësisoj ajo i vlen historisë së librit si regjistrim i ndryshimit kulturor në mbarë njerëzimin, por edhe në popuj të veçantë50.
Në rastin e bibliografisë deskriptive, e cila paraqitet si përshkrim i hollësishëm i librave si objekte fizike duke regjistruar madhësinë, formatin, lidhjen dhe kështu me radhë, bibliografi mbërrin në kufijtë e bibliofilisë. Ai duhet të gërshetojë dijen bibliografike me dashurinë për librat.
