Përshkrimi për hir të përshkrimit është si të ndërtosh një banesë në të cilën nuk do të jetojë njeri. Një bibliografi deskriptive bëhet më e dobishme kur kombinohet me kërkim shkencor përkatës në histori. Kjo e bën këtë lloj bibliografie komplekse dhe interesante, vepër shkencore dhe vepër arti.
Shpesh është e vështirë, madje edhe sot, të heqësh një vijë të qartë demarkacioni midis shkencës së bibliografisë dhe pasionit bibliofilik.
Në krye të herës bibliografia ose dija mbi librin nuk ishte zhvilluar më tej se një dashuri e madhe për librat, e cila i çonte të pasionuarit pas tyre të kërkonin të rrallën, uniken, interesanten, të bukurën.
Profilizimi, ky instrument i mrekullueshëm i zhvillimit të dijes njerëzore, pa i larguar nga njëra-tjetra këto dy drejtime të punës me librin, solli me vete dallimin qartazi të objektit dhe metodës së tyre.
